Although 991 BYD vehicles were released, another 1000 vehicles are stuck at customs; importers are helpless

රුපියල් කෝටි 360ක බැඳුම්කරයක් මත, රේගු භාරයේ පැවති BYD සන්නාමයේ වාහන 991ක් නිදහස් කිරීමට අභියාචනාධිකරණයේදී එකඟතාවක් ඇතිවී තිබුණද, ආනයනය කරන ලද තවත් වාහන 1000කට ආසන්න සංඛ්‍යාවක් තවමත් රේගු භාරයේ පවතින බව වාහන ආනයනකරුවෝ පෙන්වා දෙති. තෙවැනි පාර්ශවයේ රටකදී ණයවර ලිපි විවෘත කිරීම මගින් ආනයන කොන්දේසි උල්ලංඝනය කර ඇති බවට චෝදනා කරමින්, පසුගිය මැයි 27 වනදා සිට රේගුව විසින් මෙම වාහන මුදාහැරීම අත්හිටුවා තිබේ.





මෙම ගැටලුවට රජය මෙතෙක් නිසි විසඳුමක් ලබා දී නොමැති බව පවසන ආනයනකරුවන්, මේ වන විට අදාළ වාහන සඳහා ගෙවිය යුතු ප්‍රමාද ගාස්තු දරාගත නොහැකි මට්ටමකට ඉහළ ගොස් ඇති බවට අනතුරු අඟවයි. විශේෂයෙන්ම හම්බන්තොට වරායේ රඳවා ඇති රථ සඳහා ගෙවන ප්‍රමාද ගාස්තු ශ්‍රී ලංකා රජයට නොව, චීන රජයට ලැබෙන බවද ඔවුහු සඳහන් කරති.

ජෝන් කීල්ස් සීජී ඔටෝ සමාගම විසින් ගොනුකළ පෙත්සමකට අනුව, ඔවුන්ගේ BYD රථ 991 නිදහස් කිරීමට රේගුව එකඟ වූයේ කොන්දේසි කිහිපයකට යටත්වය. වාහනවල මෝටර් ධාරිතාව පිළිබඳ මතභේදය හේතුවෙන් මතුව ඇති රුපියල් බිලියන 3.6කට ආසන්න බදු පරතරය සඳහා රාජ්‍ය බැංකු ඇපකරයක් ඉදිරිපත් කිරීම, ඒ සඳහා වන පොලිය සමාගම විසින් ගෙවීම සහ රේගු පරීක්ෂණ සඳහා පූර්ණ සහාය ලබාදීම එම කොන්දේසි අතර වේ.



තවද, වාහනවල මෝටරයේ සැබෑ ධාරිතාව නිර්ණය කිරීම සඳහා පේරාදෙණිය සහ මොරටුව විශ්වවිද්‍යාලවල විශේෂඥයින්, රජයේ රස පරීක්ෂක දෙපාර්තමේන්තුව සහ මෝටර් රථ ප්‍රවාහන දෙපාර්තමේන්තුවේ නිලධාරීන්ගෙන් සමන්විත කමිටුවක් පත් කිරීමටද එකඟතාව පළවී තිබේ.

කෙසේ වෙතත්, මෙම එක් විසඳුමක් මධ්‍යයේ, සෙසු ආනයනකරුවන් තවමත් දැඩි අර්බුදයක පසුවේ. රේගුවේ වාහන සිරවීම හේතුවෙන් වෙළෙඳපොළේ වාහන සැපයුම අඩුවී, පවතින වාහනවල මිල ගණන් ඉහළ යෑමේ අවදානමක් මතුව ඇති බවත්, එහි සම්පූර්ණ බලපෑම මෙරට පාරිභෝගිකයාට එල්ල වන බවත් ඔවුහු පෙන්වා දෙති. එබැවින් මෙම ගැටලුව සඳහා ප්‍රායෝගික විසඳුමක් ලබාදෙන ලෙස ඔවුහු බලධාරීන්ගෙන් ඉල්ලා සිටිති.